Os días 9 e 10 de maio celebrouse en Mérida a clausura nacional do circuíto de teatro xuvenil Prósopon. Os representantes dos 10 festivais comezaron o día visitando os numerosos restos arqueolóxicos espallados por toda a cidade: Casa do Mitreo, columbario, teatro e anfiteatro. O coordinador do festival de Mérida, Luis Argüello, foi un excelente guía que nos descubriu os secretos agochados nas vellas pedras de Emerita Augusta. Ás 13:30 o alcalde da cidade recibiu a todo o grupo na sala de plenos do concello. Na súa intervención agradeceu o papel do festival como dinamizador da cultura e do turismo e renovou o seu compromiso de seguir apoiando tan loable proxecto. A continuación convidou a todos os visitantes a un xantar no Hotel Mérida Palace, no espléndido marco do pazo dos Mendoza. Pola tarde fíxose a visita á alcazaba, pontes, templo de Diana e foro.
Ás 18:00 tivo lugar a reunión de Prósopon na sede da UNED e ás 20:00 comezou o acto oficial de clausura, no que se fixo entrega do título de socios de honor a D. Felipe Gómez, director xeral de política educativa, e a D. Pedro Mateos, director científico dos recintos arqueolóxicos, polas súas aportacións ó festival de Mérida. O acto pechouse coa posta en escena do espectáculo “Vidas paralelas” do grupo “Apretacroquetas”.
O día rematou no parador de turismo, gozando dunha cena romana convidados polos colegas emeritenses. Unha sucesión de pratos cociñados segundo as receitas de Apicio, mulsum, licores, infusión e unha coidada ambientación fixeron as delicias de todos.
O domingo Luis Argüello acompañounos ó museo, onde nos deu cumpridas explicacións sobre as pezas máis importantes da colección permanente. Ó remate o IES Santa Eulalia ofreceu un viño de despedida.
Con este acto queda pechado oficialmente o festival e comezan os preparativos para o ano vindeiro, no que acadaremos a décima edición do festival de Lugo.
