Os días 17 e 18 de maio celebrouse en Tarragona a clausura nacional do circuíto de teatro xuvenil Prósopon á que pertence a sede de Lugo. Os representantes dos 10 festivais comezaron o día visitando as excavacións da catedral, onde se poden ver os restos do antigo capitolio da vella Tarraco. Desde alí foron ó museo arqueolóxico, sempre acompañados de investigadores do instituto de arqueoloxía romana de Tarragona.
Ás 11 da mañán tivo lugar a xunta xeral. As sedes fixeron balance de cadanseus festivais, que este ano levaro ó teatro a máis de 60.000 alumnos dos últimos anos da ESO e de bacharelato, batindo o record de anos anteriores. Aínda que quedaron asuntos pendientes para a reunión de setembro, a organización está xa a traballar nos festivais do vindeiro 2009.
O 17 pola tarde, tivo lugar o acto oficial de clausura, coa asistencia das autoridades políticas e académicas. Nel entregóuselle o título de socio de honra de Prósopon a D. Santiago Segura Munguía, ilustre latinista, autor de numerosos libros de investigación e divulgación e de varios métodos de latín polos que aprendimos moitas xeracións de estudantes.
Pechou o acto un concerto de Pulso e Púa da agrupación Laud’Ars.Pola noite todos os convidados asistimos ó pé da torre de Minerva, a unha representación de farsas atelanas, pola aula de teatro da Universidade Rovira i Virgili. O que vimos na escena, realmente interesante, é froito do labor investigador dun grupo de profesores desa universidade.
O domingo puidemos gozar dalgúns espectáculos de Tarraco Viva, a gran festa cultural do mundo romano que se celebra desde hai uns anos nas espléndidas ruinas da antiga capital do norte de Hispania. Vimos como se vestían os romanos, como levaban as mensaxes, como era unha compañía do exército, e moitas outras cousas que nos trasladaron a outro tempo.
Dámoslle as grazas ós membros de Prósopon en Cataluña pola súa hospitalidade e pola exquisita organización de todos os actos. Agora xa estamos a traballar no programa do próximo ano e esperamos contar de novo con todos vós.
