Os días 7 e 8 de abril tivo lugar no auditorio Gustavo Freire de Lugo a V edición do Festival de teatro grecolatino que organiza a Delegación Galega da SEEC (Sociedade Española de Estudios Clásicos).
Nesta V edición superouse a media de asistencia de 2.000 alumnos, cunha cifra de 3.054 alumnos de toda Galicia, do Bierzo e da zona occidental de Asturias, cifra que esperamos superar en anos vindeiros.
O programa desenvolto foi o seguinte:
Día 7 de abril, Xoves
12:00 Antígona, Sófocles
Grupo Sardiña dos IES Elviña e Paseo de los puentes da Coruña
17:00 Casina, Plauto
Grupo Sardiña dos IES Elviña e Paseo de los puentes da Coruña
Día 8 de abril, Venres
12:00 Edipo Rey, Sófocles
Grupo Arthistrion/Calatalifa de Villaviciosa de Odón, Madrid
17:00 Cistellaria, Plauto
Grupo Arthistrion/Calatalifa de Villaviciosa de Odón, Madrid
Opinións
Sobre Edipo Rei:
«Unha vez que se sabe o argumento da obra, pódese comprender a magnífica representación que nos mostraron un grupo de xoves. Estes xoves, con adecuadas vestimentas, representaron dunha maneira magnífica o argumento de Edipo Rei. Para a miña opinión, unha das pegas que lle poño, foi o escaso e cutre decorado de fondo. En canto ós detalles da roupa de tódolos personaxes, pareceume fabuloso, igual co detalle que tiveron para anunciar a fin da obra. O xove que facía de Edipo tiña unha vestimenta axeitada e pareceume un dos que mellor representou o argumento de dita obra. Fíxoo moi ben cando se quitou a vista. Non se puido observar cando a que representaba a Iocasta se aforcou pero de todas maneiras a obra representada foi fabulosa.»
Sobre Cistellaria:
«A miña opinión sobre esta representación é a seguinte: os xoves que representaron a comedia estaban moi metidos no seu papel e facían rir moito. O decorado foi pobre pero a roupa dos personaxes foi magnífica. O home que estaba disfrazado de muller foi o meu personaxe favorito. Facía rir continuamente e a súa voz (de muller) resultaba moi graciosa. A roupa era típica, á maneira grega. Toda a obra en si estivo moi ben, non aburría. Para min non foi tempo perdido por ve-la obra, ó contrario, pasei un agradable momento no que rin moito. O argumento da obra foi interesante e, ademais, os protagonistas representábano de maneira graciosa sen facer durmir ós espectadores que a estabamos vendo. Unha das poucas pegas que lle poño foi que ó final apuraron moito (cando estaban todos no banquete), e non se puido ver ben o final, ben, esta é a miña opinión. Todo o demais estivo ben. Entre os personaxes as mulleres vestidas de maneira cómica con eses vestidos e zapatos desenvolveron moi ben o seu papel. En resumen, gustoume moito a obra porque rin moito e non foi pesada nin aburrida, todo o contrario, foi moi divertida.»
