SEECGalicia

A continuación detallamos o programa da viaxe a Italia 2016, OPERACIÓN AVERNO, organizada por SEECGalicia para profesores e alumnos de clásicas de centros de ensino de Galicia. Presenta algunhas novidades, que esperamos que sexan do voso agrado, e terá lugar durante os días 6 e 13 de febreiro de 2016, haberá 58 prazas dispoñibles, custará 680 euros por persoa (en cuarto múltiple) e haberá que inscribirse no formulario da web de SEECGalicia dende as 15:00 horas do mércores 18 de novembro de 2015 ata as 24.00 do 26 dese mesmo mes. Pica en ler máis para acceder a toda a información.

COORDINADORES:
Fernando Domènech e Teresa Amado

DATAS:
6 a 13 de febreiro de 2016

PRAZAS:
Ofertaranse 58 PRAZAS. Os solicitantes que excedan este número pasarán a formar parte dunha lista de espera que se irá actualizando en función das eventuais baixas.

CALENDARIO:
Sábado 6:
Mañá: Lavacolla – Barajas – Fiumicino – Hotel Siracusa***.
Tarde: chegaremos con tempo para que cada “centurión” leve os seus “lexionarios” polos exteriores máis representativos de Roma para que se fagan unha idea do que se vai visitar en días posteriores; evidentemente esta visita deberá ser un paseo ad libitum: Fontana di Trevi, Piazza Spagna….; se se apunta algún profesor ou profesora que non coñeza suficientemente Roma contará co apoio dos coordinadores da viaxe.

Domingo 7:
Mañá: Visita guiada por Roma (Colonna Antonina, Pantheon, S. Luigi dei Francesi, Sta. Maria Sopraminerva, Piazza Navona, Campo dei Fiori…).
Tarde: Visita (sen guía) aos Museos Capitolinos. Ademais da súa fabulosa colección, hoxe pódense visitar os restos do Tabularium cunha fabulosa vista sobre os Foros, que nos servirá de aperitivo de luxo para a visita do día seguinte.

Luns 8:
Mañá : Visita guiada a Colosseo – Palatino – Foros.
Tarde: libre para que cada profesor leve ao seu alumnado a visitar relaxadamente sitios do seu interese, dado que a experiencia dinos que é unha mañá esgotadora. Se algún profesor asistente non ten experiencia anterior, pode recibir a axuda dos coordinadores para organizar ditas visitas.

Martes 9:
Mañá: visita guiada ao Vaticano. Museos Vaticanos, exteriores, Basílica, cripta. (Suxerimos, de modo opcional, non incluído nos gastos da viaxe, pero interesante, subida Cúpula da Básilica, se fai bo tempo.)
Tarde: Última tarde en Roma. Tempo libre, para últimas visitas que os profesores desexen facer e para compras.

Mércores 10:
Mañá: saída cara a Nápoles, con parada e visita guiada do complexo arqueolóxico de Santa María Capua Vetere, cos restos da antiga Capua, co seu Mitreo, cos restos do segundo anfiteatro máis grande despois do Coliseo, e co seu pequeno museo dos gladiadores que nos axudará a recordar a orixe da revolta de Espartaco, que puxo en serio risco a República romana.

Tarde: Chegada a Nápoles e aloxamento no Hotel Nuvò****, sito no tranquilo e nada perigoso barrio de Fuorigrotta, que será a nosa base de operacións para mergullarnos na apaixoante Campania romana durante os últimos días da nosa expedición.

Xoves 11:
Mañá: Visita guiada a Pompeia.
Tarde: Visita ao Museo Arqueolóxico Nacional de Nápoles e tempo libre no centro da cidade.

Venres 12:
Visita de todo o día á área arqueolóxica e volcánica dos Campos Flegreos, con nomes que farán voar a nosa fantasía como amantes do mundo clásico como Cumas (teredes ocasión de preguntar á Sibila o que vos interese), o lago Averno (estamos negociando unha baixada aos Infernos a ver se alguén aparece cun escudo que nos indique o futuro de Galicia e de España…), Baia, Miseno…

Sábado 13:
Mañá: Transfer Nápoles – Fiumicino e vóo de regreso a Lavacolla via Madrid. No traxecto cara Fiumicino faremos unha parada nalgún lugar relevante, que será anunciado nas próximas semanas.

IMPORTANTE: O calendario semanal pode verse afectado por varias causas: climatoloxía, dispoñibilidade de guías … Aínda que intentaremos ver os mesmos lugares planeados, quizais haxa cambios de días ou horas. Para a semana temos contratada a axencia enroma.com, empresa dirixida por un coruñés e será esta axencia a que perfile sobre a marcha os eventuais cambios. Para o avión – hotel, temos contratada a axencia Viaxes B.The Travel Brand (antiga Barceló).

PREZO:
Serán 680€ para habitacións múltiples (705 € en dobres e 855 € en individual). O aumento do custo con respecto ao de hai dous anos reflicte directamente o encarecemento do billete aéreo e o aumento das taxas de aloxamento nas cidades de Roma e Nápoles. O resto dos servizos ofrecidos lográmolos obter exactamente polo mesmo prezo que na viaxe anterior.

Como en anos anteriores a nosa axencia porá a disposición dos alumnos participantes rifas para obter fondos para a viaxe.

O prezo inclúe: Avión Lavacolla-Roma ida e volta, Hoteis de **** e *** en réxime de aloxamento-almorzo; autocares, entradas, guías, auriculares nas visitas e os 25 euros por persoa en concepto “ecotaxa” dos Concellos de Roma e Nápoles (4 e 3 euros diarios respectivamente). Non van incluídos os billetes de metro – bus por Roma nin a subida opcional á Cúpula de San Pedro. O orzamento está feito sobre a base de 60 persoas; se non se cobren un mínimo de 49 prazas, será necesario modificar algunha actividade para non alterar o prezo.

A razón pola que este ano toda a expedición parte de Lavacolla é simplemente que foi a maneira de obter o mellor prezo posible, pois levar parte do grupo dende Alvedro supoñía esta vez encarecementos da orde de 80 euros por persoa con respecto ao billete de hai dous anos. E se iso non chegara, con tempos de espera en Barajas totalmente innecesarios e tediosos. Tede por seguro de que se trata da mellor oferta posible para as datas da nosa viaxe (o voo Santiago – Roma de Vueling non está operativo nas nosas datas). En función da orixe dos diversos grupos poderemos organizar algún transporte colectivo que nos achegue a Lavacolla por un bo prezo, se hai interese niso.

INSCRICIÓN:
Aquí hai algunhas novidades, a mais importante é que atopamos unha solución técnica para que non teñades que estar a altas horas da madrugada diante dun ordenador inscribindo alumnos. Recordade igualmente que se un ben é moi desexado e son moitos os que o desexan e non alcanza a todos, a consecuencia lóxica é que algún non poderá obtelo, polo menos inicialmente: é unha cuestión de matemática, por moi de letras que sexamos. Nese senso incluímos este ano un novo criterio de prelación que busca que o proceso sexa aínda un pouquiño máis ordenado.

Os profesores responsables deberán inscribirse e inscribir os seus alumnos cubrindo o formulario que aparecerá na WEB de Seecgalicia dende o día 18 de novembro ás 15.00 horas ata as 24.00 horas do 26 de novembro de 2015. É necesario cubrir unha inscrición por alumno, sendo o límite posible para cada grupo de 15 inscricións, incluídos profesores acompañantes.

Atenderanse as solicitudes por orde de inscrición tendo preferencia os profesores socios de SEEC Galicia cos seus grupos de alumnos e tendo preferencia igualmente os profesores socios que se puxesen en contacto co coordinador antes do 18 de novembro para informar da súa intención de participar e comunicar o número de participantes no seu grupo. Preténdese así que os participantes saiban se hai superauit de solicitudes antes de inscribirse e non verse sorprendidos a posteriori. Se algún profesor inscribe alumnos sen telo comunicado previamente, debe saber que todos os profesores socios que si o fixeron, teñen preferencia.

De non completarse o cupo de prazas poderán ser admitidos outros participantes seguindo esta orde de prelación:
1. Alumnos socios de SEEC Galicia. (Trátase de favorecer os que teñen menos recursos para acceder a este tipo de viaxes).
2. Resto dos socios de SEEC Galicia (profesores sen alumnos e outros).
3. Non socios, que terán que pagar un extra de 30 euros. (Posibles acompañantes de socios están incluídos dentro deste grupo).
Unha vez finalizada a inscrición, farase pública a lista dos admitidos e será comunicada por correo aos interesados. Os non admitidos inicialmente pasarán a formar parte dunha lista de espera e serán chamados por rigorosa orde en función das eventuais baixas que se produzan.
Email de contacto co coordinador: . Para evitar suspicacias, o correo enviado será sempre a proba do contacto previo establecido.

FORMA DE PAGO:
Os profesores admitidos deberán proceder da seguinte maneira:

PRIMEIRO PRAZO: cada alumno/a (con seus apelidos e nome) deberá ingresar a cantidade de 100€ por persoa na conta que se indicará no seu momento, indicando no concepto dá transferencia: OPERACIÓN AVERNO: VIAXE ITALIA 2016, antes do 15 de Decembro.
Este diñeiro cobrarase como “garantía” de aceptación da viaxe e para facer as reservas anticipadas nos diversos museos e recintos arqueolóxicos, e non se poderá devolver aínda que non se viaxe, salvo que a praza sexa ocupada por outra persoa, dado que os cartos pagados por unha entrada nunca van ser reintegrados por un museo.

SEGUNDO PRAZO: os 580€ (605 ou 755 no seu caso) restantes hai que ingresalos na conta que nos dea a axencia B. THE TRAVEL BRAND no prazo que ela estableza, pero con antelación suficiente para emitir as tarxetas de embarque.

ROGO FINAL
Dirixido sobre todo a profesores que poidan vir por primeira vez. Intentade aclarar ben ao voso alumnado que será unha viaxe cultural; non unha viaxe para falar toda a noite no hotel (e aínda menos saír de noite) e despois ter que tirar da xente polas rúas de Roma ou Pompeia. Trátase dunha viaxe de estudos, cun programa intenso como podedes ver e no que esperamos dos nosos alumnos o máximo aproveitamento.

Non é necesario recordar que os alumnos estarán baixo a responsabilidade directa dos seus profesores e coa obriga de cumprir escrupulosamente as normas que os respectivos centros teñan contempladas nos seus Regulamentos de Réxime Interno. En todo caso, os coordinadores reclamaremos aos profesores participantes o seu cumprimento, incluso a nivel sancionador, en caso de observaren condutas gravemente prexudiciais para o desenvolvemento das nosas actividades.